Asal Usul Kutha Cepu

BEDHAH KADIPATEN PANOLAN

Dumadining Kutha Cepu

Wonten ing pamerintahan Sultan Hadiwijaya ing jaman Kasultanan Pajang kawon perang dening Kasultanan Mataram ingkang dipunpandhegani dening Panembahan Senopati ing Ngalogo inggih menika Raden Sutawijaya. Amargi kawon, sedaya Kadipaten ingkang wonten ing Kasultanan Pajang dados kekuasaanipun Kasultanan Mataram. Ananging Adipati Panolan inggih menika Pangeran Benowo ingkang dipunbiantu Kyai Balun mboten kersa ngaturaken Kadipaten Panolan dhumateng Kasultanan Mataram.

            Panembahan Senopati ngutus putranipun piyambak inggih menika Raden Romo supados saged mbujuk Pangeran Benowo inggih menika pamanipun piyambak supados kersa ngaturaken Kadipaten Panolan dhumateng Kasultanan Mataram. Ananging Pangeran Benowo kukuh mboten kersa ngakeni kakuasaan menika, malah Pangeran Benowo nantang perang dhumateng Kasultanan Mataram. Sinaosa kawon sekti, Raden Romo kalian prajurit ngupaya nglawan. Ananging wonten ing perang menika Raden Romo kawon lan kenging panah ingkang nancep ing pupunipun. Pramila, papan menika dipunwastani CEPU, mancep ing pupu.

Salajengipun, Raden Romo mlajeng ngaler lan kendel wonten ing satunggaling papan. Ananging prajurit Panolan teras nguber dipunbiantu kawulanipun ingkang sami ngungelaken kentongan. Pramila, papan menika dipuwastani Dusun Kentong. Raden Romo mlajeng malih kaliyan ngucuraken getih. Ing salah satunggaling papan Raden Romo kendel malih, wonten ing papan menika getihipun ingkah wernanipun abrit (merah) ngucur ngantos dados rawa. Pramila, papan menika dipunwastani Dusun Merah. Raden romo mlajeng malih dumugi ing salah satunggaling papan, wonten ing mrika Raden Romo kepanggih kaliyan Raden Ronggo, inggih menika kakangipun piyambak. Raden Romo seda wonten ing pangkonipun Raden Ronggo. Pramila papan menika dipunwastani Dusun Tambakromo.

Raden Ronggo ingkang kawentar sekti dipunbiantu dening eyangipun Ki Juru Mertani ingkang cerdik gantos nyerang Kadipaten Panolan. Sedaya prajurit Panolan kalang kabut saengga Kadipaten Panolan saged dipunkawonaken. Pangeran Benowo seda. Mustakanipun pecah dipunkampleng dening Raden Ronggo.

Kyai Balun mlajeng ngaler. Ki Juru Mertani mrentah dening Raden Ronggo supados nyegat Kyai Balun wonten ing watu ageng ing salah satunggaling papan. Saengga papan menika dipunwastani Dusun Tambakwatu utawi Mba’atu. Ananging Kyai Balun saged uwal lan mlajeng ngilen. Dumugi ing satunggaling papan Kyai Balun saged dipuncepeng dening Raden Ronggo. Saengga dumados paperangan. Sinaosa Kyai Balun sampun kecepeng, ananging mboten gampil dipunpejahi. Dening Ki Juru Mertani, Raden Ronggo dipunutus nuthuk mustakanipun Kyai Balun ngangge kendhil. Saengga Kyai Balun seda. Pramila papan menika dipunwastani Dusun Kendilan.

Garwanipun Pangeran Benowo inggih menika Dewi Maerah mlajeng medal Kali Bengawan Solo. Dewi Maerah mandhap wonten ing pinggiring Bengawan Solo ing sisihing jurang. Dewi Maerah ngupaya supados saged minggah saking jurang kanti mbrangkang lan krengkel. Pramila papan menika dipunwastani dusun Brangkal. Wonten ing satunggaling papan, Dewi Maerah saged dipuncepeng kalian Raden Ronggo. Dewi Maerah ethok-ethok kersa ndherek Raden Ronggo. Pramila papan menika dipunwastani dusun Batokan. Salajengipun Dewi Maerah saged uwal lan mlajeng ngilen nyabrang Bengawan Solo. Pungkasanipun Dewi Maerah sayah, lajeng bunuh diri utawi soroh rogo. Pramila papan menika dipunwastani dusun Sorogo.

Kangge ngemut-emutaken paperangan menika, sedaya papan menika dipunwastani Cepu, MANCEP ING PUPU.